«Орал өңірі» және «Приуралье» газеттерінің 95 жылдық мерейтойы қарсаңында екінші мәрте ұйымдастырылған Ғұмар Қараш атындағы «Тілші болғың келсе…» байқауы мәресіне жеткен болатын. Жаңа жыл қарсаңында «Жайық Пресс» ЖШС-ның баспасөз орталығында аталмыш байқаудың жеңімпазы мен жүлдегерлерін марапаттау рәсімі өтті.
Байқауға Батыс Қазақстан, Ақтөбе облыстарынан, Алматы қаласынан 20-ға жуық үміткер қатысты. Нәтижесінде Батыс Қазақстан облыстық дарынды балаларға арналған мамандандырылған мектеп-интернаттың қазақ тілі және әдебиеті пәнінің мұғалімі Ақмоншақ Жұмаева бас жүлдегер деп танылып, «Орал өңірі» газетіне тілшілік қызметке шақырылса, Батыс Қазақстан инженерлік гуманитарлық университетінің студенті Айдана Хамидуллина, Алматы қаласындағы әл-Фараби атындағы ҚазҰУ-дың журналистика факультетінің студенті Алпамыс Файзолла, М.Өтемісов атындағы БҚМУ студенттері Таңшолпан Қаршығақызы және Жанайдар Болатбекұлы дипломант атанды.
– Байқаудың атын Ғұмар Қараш есімімен байланыстыра қоюымыз тегін емес. Ғұмар Қарашты көпшілік білетін ақын, ойшылдығынан бөлек, елімізде баспасөз саласы қалыптасып үлгермеген шақтағы қазақ журналистикасының негізін қалаушы ретінде тануға болады. Ол газет шығару ісінде журналистік пен ұйымдастырушылық жұмысты қоса атқарған. Оның мақалалары «Қазақстан» газетінен бұрын жарық көрген татар газеттерінде, сондай-ақ «Ұран» газетінде де басылған. Ғұмар туған халқына жанкештілікпен қызмет етудің озық үлгісін көрсеткен, әлі де ауқымды зерттеуді талап ететін ұлы тұлға, – деген «Жайық Пресс» ЖШС-ның бас директоры Жантас Сафуллин Ғұмар Қараштың елі үшін атқарған ерекше еңбегіне терең тоқталып өтті.
Шара барысында «Орал өңірі» газетінің бас редакторының орынбасары Есенжол Қыстаубаев, «Приуралье» газетінің бас редакторы Роза Сыйықова байқау жеңімпазы мен дипломанттарын құттықтап, оларға жүрекжарды лебіздерін білдірді.
Байқау жеңімпазы мен дипломанттарға арнайы диплом, «Орал өңірі» және «Приуралье» газеттерінің мерейтойына орай жарық көрген «Қос газеттің тарихы», «Жайық журналистері» кітаптары және ұлылардың бейнесі басылған дәптерлер табыс етілді.
«Тілші болғың келсе…» байқауы алдағы уақытта да республикалық деңгейде жалғасын таба бермек.
Нұртас НАБИОЛЛАҰЛЫ,
“Орал өңірі” газеті