Орал қаласында Жантас Сафуллиннің балаларға арналған «Сырым батыр» комиксі жарық көрді. Жас ұрпаққа туған жердің тарихын таныстырып, ұлттық рухын көтеруді мақсат еткен кітап батыр тұлғасын жан-жақты сипаттайды.
Жаңа туынды ата-аналарға тарихымыз бен табиғатымызды балаға қызықты етіп таныстыруға көмекші құрал бола алады. Комикс мазмұнына тоқталсақ, сапарға шыққан әке мен бала «Сырым шыққан төбе» деп аталатын тұстағы кесенеге тоқтап, әкесі баласына қасиетті орынның тарихын әңгімелеп береді. Үлкендердің айтуы бойынша, бұл тарихи оқиға ХVIII ғасырдың аяғында болған. Отарлауды мақсат тұтқан саны мен күші басым жауды Сырым батыр ақылмен айласын асырып бетін қайтарған. Мұздай қаруланған қалың әскерден халқын аман сақтап, жерін қорғап ерлік жасаған орынға 2007 жылы арнайы кесене тұрғызылған. Сырым батырдың ерлігі есте сақтауға жеңіл болу үшін өлеңмен өріліп, көркем суреттермен әрленіп, комикс жанрына бейімделген. Оқиға желісін өлеңмен өрген – Нұрлан Сәдір мен Ғайсағали Сейтақ.
«2021 жылы осы комиксті дайындауға кірісердің алдында Сырым шыққан төбеге арнайы бардым. Айнала көк жиекке дейін анық көрінеді, шолып қарауға өте ыңғайлы жер екен. Төбенің үстінде, жанында қасқырдың апандары бар», дейді автор.
«Дана» орталығынан 2 000 данамен шыққан комикс облыс кітапханаларына таратылады. QR-код арқылы комикс-кітаптың бейненұсқасын қарауға болады. Баланың жадына сақтауға сеп болсын деп арнайы тапсырма мен сөзжұмбақ ұсынылған.
Сондай-ақ бұл кітап түрік тіліне де аударылған. Тәржімалаған – Нұрсәуле Ахатова. Комикстің түрікше нұсқасын басып шығару да жоспарда бар.
Айта кетейік, Жантас Сафуллиннің бұған дейін «Жетпіс балуан» комиксі жарық көрген еді. Автордың айтуынша, комикстер сериясы алдағы уақытта да жалғасады.
Маржан ӘБІШ