28 маусым елімізде байланыс пен ақпарат қызметкерлері күні ретінде аталып өтілуде. Осы кәсіби мерекелеріне орай облыс әкімдігінің ұйытқы болуымен жергілікті БАҚ өкілдері мен республикалық БАҚ-тың аймақтағы меншікті тілшілері үшін Шалқар көлінің жағасында мәдени-спорттық шаралар ұйымдастырылды. Журналистерді облыс әкімі Нұрлан Ноғаев құттықтады.
Жарқыраған күн, ыстық құм, теңіздей толқыған Шалқар тілшілер қауымына ұмытылмастай мерекелік көңіл күй сыйлады. Көл жағасында тізілген ақшаңқан киіз үйлердің саны арта түскен. Осы үйлерде Теректі ауданының ауылдық округтерінің әкімдіктері қаламгер қауымды құрметтеп қонақ етті.
Еш толастамайтын ақпарат тасқынына ілесіп, елді жаңалықтан уақтылы хабардар ету үшін күні-түні тыным таппай, жұмыс істейтін тілшілер бір сәт табиғат аясында спорттық жарыстарға да қатысты. Дамылсыз жұмыс барысында бір-бірімен емен-жарқын әңгіме-дүкен құруға мұрша таппайтын әріптестер облыстық дене шынықтыру және спорт басқармасы ұйымдастырған волейбол, шағын футбол, дартс, арқан тартыс, көңілді сөре ойындарына белсене атсалысып, мәре-сәре болды.
Спорттық шаралардан соң өткен мерекелік концертте облыс әкімі Нұрлан Ноғаев құттықтау сөз сөйлеп, спорттық байқау жеңімпаздарын марапаттады.
– Бұқаралық ақпарат құралдары қызметкерлерін, журналист қауымды төл мерекелеріңізбен құттықтаймын. Мықты денсаулық, ашық аспан, жоспарларыңыздың жүзеге асуын тілеймін. Біз теледидар тамашалап, газет оқығанда, мұның ұжымдық еңбек екенін ұғынамыз. Теледидардан бір журналисті көргенімізбен, оның артында операторлар, редакторлар, монтаждаушылар, дизайнерлер сияқты көптеген мамандық иелері тұрады. Газет тілшісінің мақаласын оқырманға жеткізу үшін де редакторлар, корректорлар, баспахана қызметкерлерінің өлшеусіз еңбегі бар. Менің ойымша, әр тілші өз ісіне адал болуы керек. Яғни оқырман не көрермен өзіндік қорытынды шығару үшін ақпаратты әсірелемей дәл болған күйінде жеткізуі тиіс. Сіздер халық пен биліктің дәнекерісіздер. Сондықтан сіздердің жұмыстарыңыз аса маңызды, – деді өз құттықтауында облыс басшысы.
Шағын футболдан «Жайық Пресс-2» командасы үздік шықса, екінші орынды «Жайық Пресс-1» командасы, үшінші орынды «ТДК-42» телеарнасы мен «Мой город» газетінің бірлескен командасы иеленді. Шағын футболдан турнирдің үздік ойыншылары болып «Жайық Пресс-2» ойыншысы Ғайсағали Сейтақ, «Қазақстан-Орал» телеарнасы тобынан Серік Дияров, «ТДК-42»-«Мой город» командасынан Медет Медресов, «Жайық Пресс-1» командасының мүшесі Айдын Аманғалиев танылды.
Арқан тартыста «Жайық Пресс» қызметкерлері облыстық спорт басқармасынан басым түсті. Көңілді сөреден І орын «Жайық Пресс-2» командасы, ІІ орынды «Жайық Пресс-1», ІІІ орынды «Жайық үні» газеті мен «Астана» телеарнасының біріккен командасы иеленді. Волейболдан «Жайық Пресс» қызметкерлері алдыңғы орыннан көрінді. Дартстан бірінші орынды «Пульс города» газетінің тілшісі Юлия Никитина, екінші орынды сол газеттің тілшісі Дмитрий Терещенко, үшінші орынды «Приуралье» газетінің тілшісі Альбина Байқонақова иеленді. «Ең үздік жағажай киімі» арнайы аталымы бойынша облыстық «Орал өңірі» газетінің бас редакторы Бауыржан Ғұбайдуллин (суретте) марапатталды. Бар-
лық аталымдар бойынша жеңімпаздарға дипломдар, сыйлықтар табысталды.
Теректі ауданы өнерпаздарының әндеріне тәнті болған тілшілердің өздері де сахна төрінен табылып, өнерлерін ортаға салды. Шалқардың жағасында өткен әсерлі кеш, мәдени-спорттық демалыс тілшілерге ерекше шабыт сыйлап, ұзақ уақытқа жетер күш-қуат бергені анық.
Нұрлыбек НҰРЛАНҰЛЫ