Биыл «Жайық Пресс» медиахолдингінің қызметкерлері кәсіби мерекелері – Журналистер күнін тағылымды шаралармен ерекше атап өтті.
Алдымен «Жайық Престің» мәжіліс залында «Жайық Престің» құрамындағы қос облыстық газет, баспахана мен 11 аудандық газеттер редакцияларының қызметкерлері жиналған басқосу өтті.
«Жайық Пресс» ЖШС-ның бас директоры Жантас Сафуллин жиналғандардың алдына әр аудандық газеттің ұжымын шақырып, сөз кезегін ұсынды. Аудандық газет редакторлары ұжымдарындағы тілші, фотограф, дизайнер, есепші, жүргізушілерінің де атын атап, түсін түстеп, еңбектеріне тоқталып, жақсылап таныстырып өтті. Редакторлардың бірі «Өмір бойы газетте қызмет етсем де, барлық ауданның тілшілері түп-түгел жиналған басқосу тұңғыш өткізіліп отыр. Аты таныс болса да, жүзін көрмеген әріптестерімізбен танысқанымызға қуаныштымыз» деп ағынан жарылды. Жантас Набиоллаұлы бұл шара ұжымдағы бірлікті нығайта түсу үшін ұйымдастырылғанын, шаһардағы тілшілер үнемі ауыл-аймаққа іссапарға шыққанда қош алатын аудандағы тілшілер екенін, оларды да бір кезек облыс орталығына шақырып, құрмет көрсету керектігін айтты. Жиын соңында ақпарат айдынында өзіндік үлесі бар жыл үздіктері алғысхаттармен және сыйақымен марапатталды. Олардың қатарында Ақжайықтан Нұрбек Ихсан, Сырымнан Бауыржан Мұстафиев, Жәнібектен Нұртай Текебаев, Зеленовтан Түгелбай Бисенов, Жаңақаладан Меңтай Бектұрсынова, Қазталовтан Гүлфия Көшбаева, Теректіден Самал Жәмет, Қаратөбеден Серікбай Хасанов, Шыңғырлаудан Татьяна Кишкина, Тасқаладан Рауан Сатыбалдиев бар. Сондай-ақ барлық аудандық газеттерге баспа техникалары сыйға берілді.
Журналистер күнін ерекше атап өту «Жайық Пресс» мекемесі үшін дәстүрге айналған. Мәселен, 2012 жылы «Жайық Пресс» БАҚ өкілдері арасында республикада тұңғыш рет бокс-шоу ұйымдастырса, былтыр қазақ күресінен «Жайық Пресс барысы» атты сайыс өтті. Ал биыл Ғ.Құрманғалиев атында-
ғы облыстық филармонияда аталмыш мекеменің қызметкерлері көрме-концерт ұйымдастырды.
Концерт тамашалауға келген жұртшылық әуелі филармония кіреберісіне қойылған БАҚ қызметкерлерінің қолөнер көрмесін тамашалады. Шығармашыл жандардың қиялы қай жағынан да жүй-
рік келеді ғой, мұнда тіпті не жоқ дейсіз – тоқыма өнімдері, батик, гобелен, керамика, панно, картиналар… Әсіресе, ардагер-журналист Мәжит Қайырғалиевтің картиналары, ағаштан ойылған кәде-
сый-сувенирлері мен теректілік әріптесіміз Людмила Мурашкинцеваның қолынан шыққан бұйым-
дар көпшіліктің қызығушылығын тудырды. Сондай-ақ «Серпін» аудандық газетінің бет құрушысы Бақыт Баймағамбетованың моншақтан құрастырған сәнді кәдесыйлары, облыстық «Приуралье» газетінің тілшісі Динара Киндербаеваның жапсырма картиналары да төңірегіне көрерменді көп жинады.
Шара барысында мекеменің бағындырған белестері, бүгінгі тыныс-тіршілігі жайлы бейнебаян көрсетілді.
– Облыс әкімі Нұрлан Асқарұлының атынан сала қызметкерлерін кәсіби мерекелерімен шын жүректен құттықтаймын. Тілшілердің еңбегі жанкешті, жұмыстары күн сайын қарбалас. Еңбектеріңіз үшін елдің алғысын ғана алу жазсын. Қос облыстық газеттің былтырғы мерейтойы қарсаңында ауқымды істер атқардыңыздар. Сондай баянды бастамаларыңыз жалғасты болсын. Қаламдарың мұқалмасын, шабыт тілеймін, – деп сала ардагерлерін, тілшілерді құттықтаған облыс әкімінің орынбасары Бақтияр Мәкен бірқатар тілшіге облыс басшылығының алғысхатын, Жаңақала аудандық газет редакциясына су жаңа аутокөліктің кілтін табыс етті.
– Еңбектеріңізге ризашылық пен алғысымызды арнаймыз. Тәрбиелік мәні бар, елге керек, қоғамға қажет бүгінгідей ғибратты шараларыңыз көп болсын. Журналистердің мұндай керемет көрме-концерті басқа салалардың қызметкерлеріне үлгі, – деді өз лебізінде Жаңақала ауданының әкімі Лавр Хайретдинов.
– «Жайық Пресс» екі облыстық және 11 аудандық газеттің, ақпараттық орталықтың басын бірік-
тірген өңіріміздегі БАҚ саласын-дағы ең ірі медиахолдинг. «Ел іші – өнер кеніші» дегендей, бұл мерекелік көрме-концертке біздің құрылымдардың барлығының да қызметкерлері атсалысты. 1923 жылы дәл осы ғимарат ішінде газетіміздің қызметкерлері театрландырылған қойылымдар қойған. Біз солардың ізін жалғаушымыз. Бүгінгі шарамыз – үлкен ұжымымыздың ынтымақ-татулығымызды нығайта түседі деп сенемін. Аудандық газеттерімізде жағымды жаңалықтар мол. Міне, өздеріңіз Жаңақала аудандық газет редакциясына көлік табысталғанын көрдіңіздер. Бұл басқа аудандарға да жұғысты болсын! Сырым аудандық газетінің редакциясына басыбайлы ғимарат берілді, құтты болсын! Жәнібектегі әріптестер Ұлы Жеңістің 70 жылдығы қарсаңында арнайы жинақ әзірлеуде, – деді өз сөзінде «Жайық Престің» бас директоры Жантас Сафуллин.
Күй шалқып, ән шырқалып, би биленді. Драмалық көріністер де қойылды. Ал «Приуралье» газетінің тілшісі Галина Самойлова әуелі Абайдың «Желсіз түнде жарық ай» әнін әуелетіп, сосын Олжас Сүлейменовтың «Айналайын» өлеңін оқығанда шынайы тебіренісімен үлкен-кішіні бірдей толқытты. Сахнада Ғайсағали Сейтақ, Қазбек Құттымұратұлы, Махмет Қажиахметов, Өмірзақ Ақбасов, Тілес Жазықбай сияқты ақын ағаларымен қатар тұрып жас әріптестер де өз өлең-жырын оқыды.
Сырым аудандық «Сырым елі» газетінің тілшісі Бауыржан Ширмединұлы мен Жәнібек аудандық «Шұғыла» газетінің тілшісі Нұртай Текебаевтың айтысы көрерменнің көңілінен шықты. Жастардың әзілі әдемі болса, сонымен қатар олар қоғамдағы өзекті мәселелерді де орынды көтере білді. «Жайық Престің» ауыз толтырып айтатын жетістіктері де жырға арқау болды.
– «Орал өңірі», «Приуралье» –
асқақ атың,
Тарихы терең сырдан
басталатын.
1917-де «Ұран» деген атаумен
жайған екен қос қанатын,
«Дұрыстық жолын»
кімдер құптамады,
«Қызыл туда» басылған
тасқа мәтін.
«Екпінді құрылыс»
боп тұрған кезде,
Жыр жазған Қасымдай
асқақ ақын.
«Орал өңірі» талайға
қанат берді,
Бұл қатарға текті алаш
тамсанатын.
Жанғали, Рақымжан,
Ақұштаптар,
Жандар ғой мақтан етіп
тамсанатын.
Қайрат ағам дүниеден
кеше озған,
Көңілден қимай көзден
жас таматын
Ақиқатты ақтаңдақ
қаузап айтсам,
Кез бе қазір
біреуден жасқанатын?
Кеңестік қанды
орақтың құрбаны боп,
Қыл бұрауда қиналды
қанша мәртің.
Ұлтшылдықты қылмыстық
бапқа салып,
37-нің қанды қасап ойранында
Ескерусіз кетіпті қаншама құн.
Атылған редактор бар
іштерінде,
Құрбандарға дұға қыл, жамағатым, – деп Нұртай бір толғап өтіп,
– Елге ісін әрдайым арнағасын,
Газетке бар ынтасын
арнаған шын.
Тұрмысында шешілмеген
түйткіл бар,
Журналистің кім елейді
жан жарасын.
«Тұрғын үй – 2020»-ны
жырлап жүрген,
Жандарға қамқорлық жоқ,
таңданасың.
Журналистер редакция
кең ордасын,
Тастамайды бермесе де баспанасын, – деп сырымдық Бауыржан өз кезегінде журналистердің біразы зар болып жүрген баспана мәселесін де тілге тиек етті.
– Көсілем қанғаныңша
құмарларың,
«Жайық Пресс», саған да
жыр арнадым.
Баспасөз саласына ұя болған
Бірісің батыстағы ұлы орданың.
Мен сені киіз үйге теңер едім,
Теңеуімді жөн болар
құп алғаның.
Он бір сенің аудандық газетіңді,
Он бір қанат керегең деп
құрамдадым.
«Орал өңірі», «Приуралье»
киіз үйдің
Қос есігі секілді сыңарланған.
Осы екі есігің ашық болса,
«Жайық Пресс», жылжымай
тұра алғаның.
Тілшілерің ол сенің уықтарың
Келісетін шығарсыңдар
бұған бәрің.
Сол үйдің шаңырағы –
«Жайық Пресс»
Бас иген алдында бір Алланың.
Сол үйдің қақ төрінде
отырған жоқ па,
Елеусін, Ғабдол-ғазиз,
Ғұмарларың.
Жарыққа жетелеген
жұртты нарша
«Жайық Пресс», ордасың
құтты нансаң.
Шаңырақ шайқалмасы белгілі ғой,
Керегең, уықтарың мықты болса, – деп сөз арасында ұжымның
тарихын, бірлігін жырына арқау етті.
Жиналған қауым тарқасарда «Тілшілердің емес, құдды бір кәсіби өнерпаздардың кешінен шыққандай әсер алып, демалып қалдық» деп алғыстарын жаудырып жатты.
Нұрлыбек РАХМАНОВ