Жақында «Жайық Пресс» ЖШС-ның бас директоры Жантас Сафуллин, «Орал өңірі», «Приуралье» газеттерінің бас редакторлары Бауыржан Ғұбайдуллин мен Роза Сыйықова Бөрлі ауданына арнайы іссапармен барып қайтты.
«Арнайы іссапар» деп екпін түсіріп отырған себебіміз, аталмыш аудан аумағында облыстық қос басылымның таралымы көңіл көншітпейді. Ақсайға ат басын тірегендегі ең басты мақсат, осы шаруаны ширатып, бөрліліктердің мемлекеттік саясатты ел-жұртқа жеткізуге бек мүдделі газеттерге жазылуын жандандыру болатын. Осы бағыттағы Ақсайда өткен жиынды аудан әкімінің орынбасары Талғат Сидық ашып, жүргізіп отырды. Ол күн тәртібіне қойылып отырған мәселенің идеологиялық тұрғыдан көкейкесті екендігін айта келіп, ағымдағы жазылу науқанында бөрліліктердің белсенділік танытатындығына өзінің ұйытқы болатындығын алға тартты. Басқосуға қатысқан білім, денсаулық, мәдениет сықылды бюджеттік салалардың басшы-қосшылары мен Ақсайдағы ірі мекеме-кәсіпорындардың өкілдері де өз сөздерінде аудан басшылығының жаңағы ниетін құптайтындықтарын анық аңғартты.
– 55 мың халқы бар Бөрлі –Батыс Қазақстан облысының іргелі аудандарының бірі. Оның үстіне біздің өңірдің басқа ауыл-аймағымен салыстырғанда Бөрлі ауданының шаруасы да көш ілгері. Бірақ бізді сіздің ауданның бір ғасырға жуық тарихы бар облыстық газеттерге жазылу жөнінен көштің соңында шаң қауып келе жатқандығы қынжылтады, – дей келе «Жайық Пресс» ЖШС-ның бас директоры Жантас Сафуллин қос басылымға жазылу бағасы, жарнама берушілерге жеңілдіктер және «Орал өңірі», «Приуралье» газеттерінің мемлекеттік саясатты ел-жұртқа жеткізудегі мән-маңызы жөнінде келелі әңгіме қозғады. Ал қос редактор негізінен басылымдардың биылғы шығармашылық жаңа жобалары, ел-жұртты, әсіресе, жастарды жат діни ағымдарға арбалудан сақтандыру, шағын несие алудың жай-жапсары және қоғамдық авторлар институтын нығайту мәселелерін тілге тиек етті. Осыдан кейін оқырман қауым өз ой-пікірін ортаға салды. Мәселен, ақсайлық еңбек ардагері Мұхтар Боқаев:
– Аудан-ауылдарға жиі шығып, агросектордың жағдайын көбірек қаузаңыздар. Өйткені ауыл шаруашылығы жанданған сайын ауыл-аймақтың шырайы кіре түседі, – десе, «Қазбұргаз» АҚ-ның тете-президенті Сәкен Шұғайыпов: – Мемлекеттік мекемелердің халыққа қызмет көрсету сапасын ұдайы қадағалаңыздар. Жақында автокөлік сатып алып, соның құжаттарын реттейін деп жол полициясы басқармасына бардым. Құдай сақтасын, бас-аяғы екі-үш сағатта, тіпті әрі кетсе бірер күнде бітуі тиіс шаруа үшін аттай 10 күн жүрдім. Өз жұмысын жетілдіру жөнінен жол полициясы халыққа қызмет көрсету орталығынан неге үлгі алмайды? Сондай-ақ Қарашығанақ қазынасын игеру барысында жыл санап отандық мекеме-кәсіпорындардың үлесін арттыру жөніндегі 2009 жылы қол қойылған меморандумнан да әзірге қайыр шамалы болып тұр, – деп өзінің орынды өкпе-ренішін білдірді. Ал аудандық «Бөрлі жаршысы» газеті бас редакторының орынбасары Айгүл Ахметова «Орал өңірінің» биылғы тың жобасы – «Әдеби жұмбақ» кітапты жата-жастана оқып өскен аға ұрпақ өкілдеріне қоса, компьютермен көздерін ашқан жастардың арасында да үлкен қызығушылық туғызуда екендігін айтып, бізді бір қуантты. Аудандық білім беру және денсаулық сақтау салаларының басшылары да облыстық газеттерге жазылған оқырман олжасыз қалмайтындығын атап өтті.
– Мен үшін газет-журнал – күнделікті ішім-жеммен пара-пар рухани азық. Сол себепті мына азаматтардың келген шаруасын қамшы салдырмай тындыру керек, – деп кесіп айтып, аудан басшылығына қарата сөйледі жиын соңына таман бірнеше перзент тәрбиелеп өсірген «Батыр ана» Дәмелі Құсайынқызы.
Осылайша біз баспасөзге жазылу науқанына білек сыбанып кіріспек ниеттегі бөрлілік ағайынның арасынан қанаттанып оралдық.
Беркін САЛЫҚҰЛЫ,
Бөрлі ауданы